القول الفصل

القول الفصل

الثلاثاء، 19 يوليو 2011

تأملات ترانستسندنتاليّة في تبلور ثقافة المطاعم!



-1-

كل المصاري الي دبّوها، وهياهن بكشّوا ذبّان.

تدخل إلى مطعمٍ RESTAURANT DU PALAIS-ROYAL. يأتي النادل بلباسه الأبيض الأنيق، يأخذ منك معطفك. يسألك: "وحيدًا؟" بالفرنسية الهادئة. وحيدًا تُجيب. تتقدم، من خلفه، تجلس على الطاولة البيضاء، أمام الأواني الفضيّة، وزجاجة نبيذ معتق منذ 1963، عام وفاة إيديث بياف. في الخلفية موسيقى Spring Song لمندلسون. ثم يعود النادل بعض لحظات مع قائمة الطعام، يضعها أمامك بهدوء، دون ان تصطدم زاويتها الحديدية الصغيرة بطرف كأس النبيذ، دون أن تمنحك نشوة سماع رنة كأسٍ تكسر هذا الصمت. ثم يدير النادل ظهره فتناديه: "تغلبش حالك خيّا، فش حاجة مانيو، رشّلي شوية سلطات عذوقك، وصحن مشكّل بس بدك تزبطه، ولا أمرًا عليك... قلّي.. عزّات بعده بشتغل هون؟"

-2-


في الصورة: النبي إبراهيم بعد ذبح ابنه.

أنا بكره المطاعم. بكره المطاعم وبحب البارات. ومع هيك أنا فخور أنه كل الطباخين بكل المطاعم بالبلاد عرب. قبل أسبوعين بديت أفكر بموضوع انه إيش يعني מסעדת שף? انه يعني مطعم الـChef... هاي بتكون مطاعم كثير راقية وغالية وتاعت اغنيا وقصص وفي منها بس بتل ابيب وهرتسليا وقصص..  وبعد بحث وتمحيص وتفحيص وتخبيص.. مقدرتش أوصل لحل. انه يعني شو يعني مطعم الطباخ؟ انه يعني بمطعم ثاني مين بطبخ؟ الحارس؟ مَ كل المطاعم مطاعم فيها شف، وهو الي بطبخ. شو يعني Chef Resturant.
بعدين اكتشفت انه מסעדת שף، هي عمليًا المطعم إلي الطباخ فيه مش عربي.

-3-
في الصورة: حسن حجازي
أكثر إشي بضحّك بالعالم هو وجه صبية عربية بتفوت ع حمام مطعم بتل أبيب مثلًا، وبتدوّر ع حمام الصبايا. وتعال اسا انت رفيق فهمها انه بهذا المطعم مفش حمام صبايا وحمام شباب، في حمام، في حمام بمعنى انه بالزبط زي مَ في عندكو بالبيت. لازم تشوفوا عشان تفهموا: التلبك، التردد، الخوف، المجازفة، الوقوف أمام قرارات مصيرية. الباب اليمين ولا الشمال! بس يمكن، بتعرفو، بقدر اتفهم التخوّف عند صبايا تربّوا بمجتمع مقنع نفسه انه الصبية ممكن تحبل من حيوان منوي عالق ع منشفة مغسولة اربعمية مرة قبل ثلاثين سنة.

-4-
ليش كل مرة بروح ع مطعم Spagetti بطلع محل معكرونة؟


-5-
ممكن حدا يفهمني ليش صحن الحمّص حقّه 15، بينما صحن الحمص مع صنوبر حقّه 27؟

 -6-
مستحيل شب عربي يحس بلحظة نشوة وفخر واعتزاز، اكثر من لمّا يفوت يوكل مع صبيّة (متعرف عليها جديد) بمحل باجيت أو شوارما، وصاحب المحل يكون يعرف الشب، وبعرف شو بده بالرغيف! وَلاي!

-7-
وانا بالمدرسة رحت أشتغل بالجلي بمطعم بالتخنيون. كنت مكيّف بالشغل. كنت حاسس حالي الله... مكنتش أي جلّا.. كنت جلّا جلاله!

-8-

كل مطعم رح تفوت عليه بحياتك، حتى لو  مطعم  فرنسي وحاطين فيه أغنية




أو مطعم إيطالي وحاطين فيه



أو مطعم إسباني وحاطين فيه


أو مطعم مكسيكي وحاطين فيه

أو حتى مغربي وحاطين فيه




مش مهم ع أي مطعم رح تروح... فوت ع المطبخ، بتلاقي عربي بالجلي عم بسمع:













هناك 3 تعليقات:

  1. "ليش كل مرة بروح ع مطعم Spagetti بطلع محل معكرونة؟"
    existentialism at its best :)

    ردحذف
  2. hehe ana elli ba3mal falafel fi mis3adat ha chef w basma3
    http://youtu.be/WLP9qkyQubA

    ردحذف
  3. مش ممكن مجودا يكتب مدونه بلا ما يكفر بعدين جلدو بصير يحكو .. ان شاءالله جل جلاله يحرقك او يشل لسانك بلكي رجعت لوعيك بدي اشوف بعدها ازا ما رجعت لوعيك مع اني بنفس الوقت ما بتمنالك الشر بس كتير بتزودها ملحد انت حر بس في مسيحيين ومسلمين بامنوا بالله يعني سكرو لتمك وبكفي زناخه

    ردحذف