بتراجع، يمكن عن كثير أشياء كنت أفكّر فيها؛ أو ان سوء فهم الآخرين لما أقول شو بفكّر جرّني إلى مكان ما هو مش انا، وأرغمني على الدفاع عن أشياء أنا مش عنجد مُقتنع فيها. أنا مع التجارب اللانهائية في الحب، ضد العلاقات، ضد الإلتزامات وضد كل إشي الناس بتفكّر إنه صح، لأن مُستحيل الكل يجمع على شيء ويكون صح. (للتوضيح: اذا الكل موافق على اشي صح، فمفروض الكل يكون صح، وبما ان من المستحيل الكل يكون على صواب، فمن المستحيل ان هذا الاجماع يكون صحيح.) وبفكر ان اخر اشي ذات أهمية هو الجسد، وخاصًة الخرطة الي اسمها عذرية. ولكن، بفكّر ان الجسد مش صح انه يخضع لتهوّر التجربة العشوائي والمطلوب. يمكن مش قادر أكوّن الصورة بشكل كامل، ويمكن هذا هذيان غير مكتمل، ولكن ان نقول ان الجسد مش ذات اهمية، والجسد لا يعبر عن جوهر الانسان (اي انك تمارس الجنس شمال ويمين والمهم روحك يا روحي) مُمكن يوصلك لمكان مثالي (رتسيوناليزيم يا بابا) وتحس حالك فجأة ولّا كل اشي بتآمن فيه بينهار قدامك. لان الفكرة بالاساس، فكرة حريتك المطلقة، مش ممكن تنفصل عن ماديّة العالم الي مفروض تعتقد فيها.
بتصوّر مهم ألاقي الحدود بين التجربة العاطفية والتجربة الجنسية، مش عشان حدا، عشاني، عشان أفهم. وكمان سؤال، للحلقة القادمة، بنفع تشوف الحدود بين التجربتين بس من محل ذاتك بدون قياس الموضوع بالنسبة للآخر؟ كثير أسئلة.. منشوف شو منساوي. يلا، إلي بعده.
2. تكبّر..تكبّر
يا رفيقة، لما كنّا نضل نسمع أغنية تكبّر تكبّر.. وكنت أغنيلك إياها..مكنش قصدي عنجد إنك تلعني ربّي لحد مترجعي تحكي معي... الـEgo بالأغنية كان مدته 5 دقايق و29 ثانية، مش سبع أشهر.
3. غياب رب الحانة.
كنت أفكر في الآونة الأخيرة بكتابة نص ما يحاول تصوّر الحياة بعد إكتشاف وإثبات عدم وجود الله بشكل قاطع (بغض النظر كيف)... كثير أفكار نغشة طلعت بموضوع ان تتخيل العالم بدون ألله. كثير شغلات مُمكن تتخيلها، بعضها منطقية بعضها خياليه، بعضها بتضحك بعضها بتبكي، بعضها ممتع، بعضها ممل، بعضها نافع للكتابة، بعضها غير نافع. مبارح حاولت بدل هلفكرة، أتخيّل هلبار الي قاعد فيه بدون موسيقى، شو ممكن يكون. بس مطلعش معي إشي. يبدو، العالم بدون موسيقى أصعب بكثير من العالم بدون الله.
4. عاجل:
الثمالة تُثير الذهن والأفكار، إلا أنها تحول دون إمكانية صياغتها.
5. حوار العُمُر
-علعافية عمّي عصام، في كولا؟
-لا والله خالصة، في فانتا.
-طيب، اعطيني كمان علبة حمص لو سمحت.
-في طحينة، تمام؟
-ماشي، قنينة مي برضه.
-في صودا.
-لأ، خبز بدي اذا في..
-في باجيت، بنفع؟
-تسلم.
6. عن أخوي
عندي أخ بتلخّص بمُعادلة:
الوقت الي بقضيه الإنسان العادي يدرس =X
الوقت الي بقضية أخوي يدرس = Y
فترة حياة دودة القز= W
فترة حياة السلحفاة= Z
المعادلة:
X/Y=Z/W
*عفكرة، أخوي قرأ الملاحظة والمعادلة، ومفهمهنش.
7. مرةً أخرى؟
قل، ماذا تريد؟
حصة الليث من إرث المشاع؟
قبضة الحسم على طاولة الإجتماع؟
إمرأة تبكي ألف عام للوداع؟
تنساها.. وتسلب منها ضوء المدينة
تقضم انهيارها..
وتبتسم..
ثم تعود لاهثًا
إليها
حين تهيب بعظمتك...
رغبة الجِماع.
8. بحبك، وهاي قصّة طويلة نسبةّ لملاحظة.
9. مقعد البار...حظ الوحيدين.
10. عذرًا محمود درويش، يمكن في إشي غاب عنّك لما كتبت القصيدة... الجميلات... هن الي بلاقوك لابسات فستان ابيض قصير وانت طالع من امتحان مش عارف تحل منّه غير سؤالين من عشرين، وبلعنوا أبو رب ربّك.. وبضحكوا...وبروحوا.
مما اقتضى التنوير.
:)) جامد يا جامد
ردحذفايش رائع بس رائعععع
ردحذفبحبك
ردحذفبحبك
ردحذفكتير صح ...نكشة ..نيالها ...وكيف نشفى من متابعة مدونتك ؟
ردحذف