القول الفصل

القول الفصل

الأربعاء، 27 أكتوبر، 2010

ملاحظات غير ميثافيزيقية




بسم الله الرحمن الرحيم
"وَأَعِدُّوا لَهُمْ مَا اسْتَطَعْتُمْ مِنْ قُوَّةٍ وَمِنْ رِبَاطِ الْخَيْلِ تُرْهِبُونَ بِهِ عَدُوَّ اللَّهِ وَعَدُوَّكُمْ"
صدق الله العظيم



لقد تم بعون الله ونصره الإستيلاء على المدونة لمسها بديننا الإسلامي الحنيف والرسول الأعظم الأكرم عليه صلاة الله وسلامه، لنعلم الكفرة والملحدين العلمانيين ودعاة الفسق والهلاك والخلاعة والــ... خلص هذول الي بعرفهن .. خلص منيكة.. بمزح.. المهم... اشتقت اكتب ملاحظات... زمان ها؟






1. واحد أحد، اليوم دخلت إلى أول حصة في  مادة جامعية، بالعربية اسمها "إشكاليات مركزية في إرادة الله الحرة" طبعًا كالعادة، حصة بمعظمها نقاش أكاديمي.. ما الذي قاله الرفيق شبينوزا.. وشو صرّح الأخ لايفنيتش.. وشو راي اوغوسطينوس وشو بقول كلارك.. كل الجماعة يعني.. وكلهم طبعًا ماسكين شَل الله من جميع الإتجاهات، وكل واحد يتكتكك فيه كيف بده، ويلعب فيه (بالله يعني) وينظّر عليه.. وأخونا من جمعية "إقرأ" الإسلامية قاعد بالحصة ومش عارف الله وين حاطّه... ومحسوبكم طبعًا مقموع بالمجتمع.. وبقدرش بقعدة أرجيلة بالسكن الطلابي أحكي للأخ عن راي شبينوزا بالله.. وبالأحرى بقدر.. بس مش راح يضل حدا إلا يضحك علي، يفصعني، يكفّرني، وبأسوأ الأحوال يتركوني ويروح لأني بحكي حكي فاضي... بس وين عمّي؟ هلا هلا.. اسا اللعبة بأرضي خيّا... اسا لما بدي انزل بالله، هون بالحصة، الكل بزقفلي.. واذا تمسخرت الكل بضحكلي.. واذا حكيت ع الاسلام والمسيحية واليهودية وانهن حكي فاضي الكل رح ينبسط.. والأخ الإسلامي تاع "إقرأ" إذا حكى مفروض الكل ينزل فيه ويوقف ضده.. ويسعد الله وصل الدعم يسعد الله وصل الدعم.. وكيّفنااااا والجبهة الجبهة الجبهة ...


وفجأة... بتتذكر انك بالجامعة العبرية... انك بالقدس المحتلة... انك قاعد بين 30 واحد اقل واحد فيهن كان ضابط بشي كتيبة بالضفة.. يا باطل... أنا أنزل بواحد عربي قدام ولاد الشرموطة الطلاب اليهود؟... يا حيف عالزلام... بـــاطـــــل... حبايب قلبنا جمعية إقرأ... وطلع البدر علينا.. من ثنياااات الودااااااااااع... وجب الشكر علينااااا ما دعى لله دااااااااع... دااااااع...داااااااااااع عنك لومي فإن اللوم إغراء!










2. الطيور إشي كثير أصولي، ورجعي، ومتخلف، ومتمسك بالعادات... أكثر من الإخوان المسلمين فرع أشكلون. عنجد عم بحكي. شو السيرة؟ واذا يعني حسب تراث الطيور على أشكالها: حمام، عصافير، نوارس، نقار الخشب.. إلى آخره.. أو حسب تراث الطيور على أشكالها: تقع... أو حسب تراث الطيور بشكل عام.. لازم يهاجروا بالشتا... بس بلييييز... بليييييز... إيش مالكو؟ أي شتا؟ فش شتا! يا أغبيا! هاجروا بالصيف! بالصيف الحم بقتل! درجة الحرارة 50 وكل سنة عم بتزيد... يلعن دينكو ليش بتهاجروا  بالشتا؟


-خيا الصيف عطل ورحلات وقيم وحط... كل الطيران بصير أغلى.


3. وجدت الإثبات القاطع على مقولة "كل شي زاد عن حدّه، نقص"... تخيّلوا أعزائي، لثانية واحدة، لو أن بدل التفاحة، سقطت على نيوتن، كل شجرة التفاح.


4. أنا وإنتِ، حبيبتي، هيك... وعشان هيك... خليكي حدي.. وتخلينيش ولا مرة أزيح عنّك، خليني دايما حدّك... لأنه حبيبتي.. كلشي زاح عن حدّه نقص.


5. في المرة القادمة التي تسمع فيها عربي يغني في مظاهرة "لا العلم الأحمر لاح، لاح، لاح..." اعرف أنه يقصد علم تركيا.


6. وقال شو، نازلة من باص إيغيد، وطالعة من كراج باب العامود على رام الله بباص شوفيره الحج ابو النمر وبتناول الشوفير، بدل المصاري... كرتيس همشيخ!..الله قالها هاي؟


7.وأعدّوا لهم ما استطعتم من قهوةٍ !


8. تساؤلات آرام المصيرية:  "بابا..انت صلّعت لما كان هون فلسطين ولا بعدين؟"


9. ويهتف الشاب الواعد: جورج حبش قالها!
وترد جماهير شعبنا: جورج حبش قالهاا!
ويكمل الشاب الواعد: ثورة؛ واحنا رجالها!
وترد جماهير شعبنا: ثورة؛ واحنا مالنا؟


10. -اسا.. جاوبني واحده واحده...
-قول
-انت موافق على المثل "اتقي شر من أحسنت إليه"؟
-أصدق مثل...
- وانت بتقدر تنكر انك تتقي الله؟
-أعوذ بالله...
-شفت، قلتلك، هذا الألله تاعك.. هو نفسه.. شر من أحسنت إليه.




11.  الوحدة: أن نقف وحدنا أمام المرآة، ان ننتزع بقوة، بعنف  وبحنق منظومة الوعي المدافع التلقائي عن ذاتنا الضعيفة، الوحدة أن نقف عراة أمام أنفسنا ونصرخ بصوت عالٍ: أنت أخطأت. الوحدة، أن ننام عراة في الفراش ونتأمل أخطر التجارب. (...) الوحدة: أن ننفصل عن الأشياء في ما حولنا ونقع، نسقط، ننهار... في واقعٍ واحد: واقع الأنا الحاسمة.


مما اقتضى التسفيه







-حبيبي... بس كيف سارتر فرنسي؟ كيف فرنسي ممكن يصير رئيس أميركا؟
-كمان دور؟ كارتر حبيبتي..  كارتر هذاك.

هناك تعليقان (2):

  1. يحيي أصلك !! يا رواق !! :)

    ردحذف
  2. حلو حلو :) و بالأخص ملاحظة رقم ٢ تبع الطيور D:

    ردحذف