القول الفصل

القول الفصل

الثلاثاء، 15 يونيو، 2010

نشرة الأنبياء...

1. بما ان المونديال مطوّل وبدينا نكتب ملاحظات المونديال.. رايحين نكمّل قد ما منقدر.. قد ما بقدر.
بتطلع مرات أشياء بايخة كثير، مرات أقل، بعرف. مرات بكون مستعجل ومش فاضي اكتب بس بكتب.. مرات بكون صرت شارب منيح(عشان فطبول بدون بيرة صعب) وبطلع شوية تخبيص.. بعرف. بس يطلع بايخ شوي.. المهم يطلع.. مهم يطلع لأنه مهم الأشياء الي بتخبط براسنا والهبل الي بضل يركض ورانا مهم يضل يطلع.
مهم انو يضل حدا يحاول يشوف الأشياء بطريقة هبلة.. هبلة لأنها بتحاول تلعب على حبال المنطق المُمل تاع الناس... بدكو هبلة؟ هبلة. زهقت وهو كلشي زي مَ هو.
بكتب كل يوم، حتى لو الي بنكتب مش "جامد"، أولًا عشان متخنقنيش غرابتي عن نفسي (تصدير عُقد يمكن؟).. وثانيًا لان الكتابة اليومية لوحة منضل نضرب عليها أسهم.. يمكن في 1000 سهم ما بيصيب النقطة الحمرا.. وسهم واحد بصيبها.. وببسطنا.
هاي مش جريدة.. ولا كتاب.. ولا مجلة عم نكتب فيها.. هاي مدونة بتوسع كل الخربشات، العُقد، الهبل، الأعصاب، المسخرة، الأدب، السياسة، الخرا، الحب، الجنس، الفتور، الغرابة والغربة... والأهم: بدون غربلة.

2. قرأت مقال نشره في مدونته الكاتب علاء حليحل تحت عنوان الآن الآن وليس غدًا: هشام نفاع لرئاسة تحرير "الإتحاد".. وبتصوّر موقفي من الحزب الشيوعي الاسرائيلي معروف.. ومن الاتحاد.. ومن كثير شغلات.. ويمكن هون المكان الي ممكن ترجعوا فيه لشو حطيت بالبلوج وقت وفاة الفيلسوف الجابري.
في كثير ناس منحبهن.. منحبهن مع انه ممارستهن وفكرهن بيروح لأماكن منرفضها كليًا، لأسباب غريبة ومش مفهومة.. بس في هذاك الشعور القوي انو هذول الناس فيهن بوصلة بتحركهن وبتقدوهن لإشي نظيف وواعي. بالرغم من شو هو الحزب الشيوعي الإسرائيلي وشو هي الجبهة... هشام نفاع صحفي وكاتب وإنسان يستحق الكثير الكثير الكثير... ورئاسة تحرير "الإتحاد" هي أقل ما يمكن.
إليكم المقال.. ويُرجى نشره
مدونة علاء حليحل :

الآن الآن وليس غدًا: هشام نفاع لرئاسة تحرير "الاتحاد"


3.
- بعرف يا رفيق انه من طلب العُلا سهر الليالي... بس مش هيك...
- كيف يعني مش هيك؟ شو قصدك؟
- يعني سهر الليالي... بس يعني.. مش في البار..
4. انا متأكد مليون بالميّة إنو الفيسبوك إنضرب:

5. النشرة الجويّة: اليوم ستكون الأجواء خائبة جزئيًا.

6. عنجد أغنية الشهر... شُكرًا يا صديقي:

ليست هناك تعليقات:

إرسال تعليق