القول الفصل

القول الفصل

الأربعاء، 3 مارس 2010

توضيح



-...وبتكون انت، يا معلم، مفكّر إنك بتعرف.. انك شو.. إشي كبير مثلًا أو إنو بلاش كبير بس إجمالًا بتعرف.
وبتصير انت، يا معلم، تمر الأشياء من تحتك أو حتى من فوقك أو حتى فيك، وانت شايفها وواعيلها بس مش عم تعمل بالموضوع إشي... بس إنو شو..انت بتعرف.
وبتبدا انت، يا معلم، تدور على شرعيّة انك انو الشغلات بتمشي غصب عنك، وطبعًا بدكاش تتنازل عن فكرة إنك بتعرف.
فبتُصبح انت، يا معلم، تأدلج، سجّلها بقاموسك هاي راح تستعملها كثير.
وأدلجوا الساحة والساحة لنا..
بس إسمحلي، يا معلم، أقول انو انت بتعرفش اشي..وكلشي بتفكر انك بتعرفه مش أكثر من هواجس فارطة ومشاعر طفولية بتزتك على تجربة كلشي.. زي ولد صغير بزت حاله من رابع طابق عشان يشوف شو بصير.

بأكم قصة بعد، يا معلم، حابب تعيش؟ بتفكّر إنك مش راح تتعب؟ بتفكّر إنك بتقدر تزعبر على الله وتغيّر كلشي بالدنيا وكلشي الدنيا ماشية عليه؟ بتفكّر إنو عنجد في حدا قبلانك هيك؟ مش ملاحظ انو كلهن ماخذينك على قد عقلك؟ كلهن غلط وبس انتي الصح؟ ولو؟ لهلدرجة؟ مفكّر انو هاي اللعبة مش رح تخلص؟ مش ملاحظ انك بتفكر بأشياء سخيفة وبعيدة عن الواقع؟ انو اوكي.. بتحب "اليس في بلاد العجائب" بس إنو شو مع تحل عن طيزنا وتكتبلك مقال بكل العرب يذكر الناس انك موجود.. محضرتك أمل.. أمل ولا أنا مشبه عليك؟

خلص.. يا معلم.. منمشيلك اياها انك جامد.. وانك قوي.. وانك فهمان والى آخره.. ومُمكن كمان نعمللنا شي طريقة نرجعك على الحزب ومنتكتكلك شي منصب... وبتصير تكتب كل اسبوع بالجريدة ايش بدك .. لحد 700 كلمة وانت اختار اسم الزاوية.. انو مثلًا "تأملات إغترابية" أو "ملاحظات حول حال الأمة" او اي اشي انت بتختاره.. بس إنو..شو مع ترخيلنا شوي قصة انو بدك تغيّر العالم؟ مهي واضحة يا بابا.. رأس المال اقوى من راسك... يو هاف نوثينج تو دو ويذ ذيس فاكت.. وانت ، يا معلم، داير تأدلج بعصر بطل فيه محل للأيديولوجيا لأنو الأيديولوجيا ما بتبيع.. واذا باعت.. فبتكون أيديولوجيا قبلانة بأيديولوجيا غير إلي اساسها بانك تبيع وتشتري.. يعني راس مال..
مالإشي واضح، يا معلم، خلص تحاول.. عيش هلستين سبعين سنة كيف مأجت تيجي، منزبطلك بآخرهن اكم تكريم محترم.. وافرقنا بريحة طيبة... اكتبلك 15 كتاب.. اشتغل مسرح اذا بدك او اكتب اغنية.. ايش بدك.. سياسية كمان بنفع أدب بنفع كلشي.. بس إشي في إطار الممكن يعني..هيك اشي ميوزّش في ذينينا كثير.. علخفيف يعني.
يخلف عليك، يا معلم، وبتأمل نقدر نوصل لصيغة مشتركة مُريحة إلنا وإلك يعني إذا أمكن.. شو قُلت؟

- على إستك مرت عمّي

هناك تعليق واحد:

  1. حبيت.. منيح تمر براسك هيك افكار مرات

    ردحذف