عَفريت جمال عبد الناصر/ أحمد حدّاد

يا سلام
ده مش معقول
إيه ده؟!
يا قلبي يا شاعر ..اهدى
خلص الورق وانت بتكتب
حتى القلم قرب يفضى
ايام ما كانت مصر شباب
والقاهرة كانت قاصر
كان في كلام لساه متساب
لازق في طربوش الناظر
طلع القمر وبوجهه تراب
مضروب متين مليون قبقاب
والي فضل من دي الحكايات
عفريت جمال عبد الناصر
والله زمان يا سلاح يا عجوز
والله زمان يا طابور يا طويل
والله زمان يا شطوط النيل
واغاني مصر المحروسة
محروسة سابت ابو محروس
وتجوزت ابو شعر حرير
شكل الحياة فجأة تغيير
وطابور طويل وبقى قصيّر
عجزتوا بدري ليه يا عيال
ومشيت بسرعة ليه يا جمال
نده القمر عبد الناصر
خايف أغني بالأحضان
كانت بلادي حلوة زمان
دلوقتي اغنية حزينة
وتاريخنا جوا الفاترينا
ونفسي اخذه بالاحضان
شفت المظاهرة وانا سكران
والطلبة بميدان التحرير
بتشبه البحر الغضبان
طالعة تصرخ لجل تعيش
وكلهم سيد درويش
وكلهم عبد الناصر
وباعوكي فجأة يا قضية
كنتاكي غلب الطعمية
خد مني غنوة وطنية
بكرى العيال هتغنيها
يا احلى اسم يا امريكا
يا اسم مليان مزيكا
عيال متفهمش كلامهم
امريكا اقصى احلامهم
وهي بطلت افلامهم
بس القصيدة الحقيقية
امريكا ازمة قلبية
قتلت جمال عبد الناصر